Sagan gerist í Virginíufylki, hvers staða er áhugaverð í ljósi sögunnar. Þó íbúar margra fylkja í Suðurríkjunum væru ekki allir sammála um þá útfærslu að skipta Bandaríkjunum upp í tvö sambandslönd, þá var klofningur innan fylkis afdrifaríkastur í Virginíu, sem liggur á mörkum þrælahaldsfylkja og afnámsfylkja. Íbúar í vestursýslum fylkisins óskuðu ekki eftir úrsögn úr sambandi ríkjanna samhliða hinum sýslunum. Vestursýslurnar klufu sig frá og fengu inngöngu í Sambandið sem nýja fylkið Vestur-Virginía þann 20. júní 1863.
Úrsögn þeirra fylkja, sem svo mynduðu Suðurríkjabandalagið (e. Confederacy), úr Bandaríkjunum eða Sambandi ríkjanna (e. Union) gekk mjög hratt fyrir sig og án nægjanlegs undirbúnings. Skil milli sambandssinna og aðskilnaðarsinna voru ekki endilega skýr og hollusta við hvorn málstaðinn fyrir sig fór ekki alltaf eftir búsetu eða þjóðfélagsstöðu svo æskuvinir, nágrannar og jafnvel fjölskyldumeðlimir gátu fundið sig knúna að velja milli þess hvort ætti sterkari ítök í þeim; hollustan við heimafylkið og nánasta samfélag eða við ríkjasambandið. Í sögunni Reiðmaður á himni kemur þessi úlfakreppa fram, en þó ekki fyrr en í lokin þegar öll kurl eru komin til grafar.
Önnur smásaga Bierce, The Affair at Coulter’s Notch , gerist líka í Virginíu-fylki og segir frá viðlíka sálarstríði þegar hermenn neyðast til að taka þátt í árás á heimahagana.
Meira um Virginíufylki á Wikipediu (á ensku).
Um Vestur-Virginíufylki á Wikipediu (á ensku).